12 pumuga, buong Jolo Police sinibak

Sinibak sa puwesto ang buong puwersa ng Jolo Police sa Sulu matapos tumakas ang 12 bilanggo sa detention cell nito, noong Sabado ng umaga.

Inihayag ni Senior Insp. Jemar delos Santos, tagapagsalita ng Autonomous Region in Muslim Mindanao (ARMM), na pinangangasiwaan na ngayon ng Provincial Public Safety Battalion ang Jolo Police Station makaraang tanggalin sa puwesto ang lahat ng pulis nito.

“The relief was ordered by the Regional Director (Chief Supt. Graciano Mijares). All police stations were also alerted as part of the pursuit operation,” ani Delos Santos.

Sinabi ni Delos Santos na tumakas ang lahat ng 29 na nakapiit sa presinto, bagamat kaagad na muling naaresto ang 17 sa mga ito.

Paglilinaw ni Delos Santos, pansamantala lamang ang pagkakatanggal sa puwesto ng buong Jolo Police hanggang hindi pa natatapos ang imbestigasyon sa insidente.

Nilinaw ni Delos Santos na karamihan sa mga pumuga ay nahaharap sa drug cases.

Ang mga ito ay sina Herbert Bael, Radzmir Salahuddin, Nurhassan Taasan, Alim Misah, Abdulwahid Lipae, Junal Sali, Alvin Hamdi, Al-Amil Kapili, Algamer Bantala, Muthamir Pangambayan, Khan Balang, at Dante Abdulla.

“They used a picklock in opening the main padlock of the detention facility. All of the 29 inside escaped but 17 of them were recaptured,” aniya.

Nagsasagawa na ngayon ng manhunt operation laban sa 12 pang preso.