4 timbuwang sa Tondo shootout

Tumimbuwang ang apat na hindi kilalang lalaki na sakay sa dalawang motorsiklo matapos umanong makipagbarilan sa mga pulis na aaresto sa kanila sa magkahiwalay na insidente sa Tondo, Maynila, kahapon ng madaling araw.

Unang napatay ang dalawang suspek na inilarawan ng awtoridad na nasa 30-35 anyos, may taas na 5’3” hanggang 5’6”, katamtaman ang pangangatawan, kapwa nakasuot ng clinical mask at puting T-shirt, ang isa ay nakasuot ng itim na cargo shorts habang gray jogging pants at may tattoo na ‘Delpan BCJ 32 Raymond’ sa likod ng kanang balikat.

Sa imbestigasyon ni SPO4 Glenzor Vallejo, ng Manila Police DistrictCrimes Against Persons Investigation Section (MPD-CAPIS), dakong 2:45 ng madaling araw nang mapatay ng mga tauhan ng Smokey Mountain Police Community Precinct (PCP), ng MPD-Station 1, ang mga suspek sa isang engkuwentro sa Road 10 Bridge sa Tondo, na sakop ng Barangay 108, Zone 10.

Unang nagsasagawa ng Oplan Sita sina PO1s Normal Alvin Santos, Oliver Satur, Rodolfo Ramos at Leandro Veloso, sa naturang lugar nang mamataan ang pagka-counter flow ng mga suspek na sakay sa itim na Yamaha Sky Driver 125 na walang plaka.

Nang tangkang sitahin ng awtoridad, umiwas ang mga salarin at sumibad kaya hinabol sila hanggang pagbabarilin umano ang mga pulis na masuwerteng hindi tinamaan.

Napilitang gumanti ng putok ang awtoridad at napatay ang dalawa.

Narekober umano sa dalawa ang isang .38 caliber revolver, isang .38 caliber Armscor 202, na parehong may tigatlong bala at walang serial number, 13 pakete ng hinihinalang shabu, at isang motorsiklo.

Samantala, bandang 3:45 ng umaga nang nakasagupa ng mga tauhan ng MPD-Station 7 ang dalawa pang hindi kilalang suspek sa Antipolo Street at Jose Abad Santos Avenue sa Tondo.

Ayon kay MPD- Station 7 commander, Supt. Gerry Corpuz, nakatanggap sila ng sumbong mula sa mga residente na may namataan ang mga itong riding-in-tandem na kapwa walang suot na helmet at nagpapaikutikot sa lugar.

Mabilis na rumesponde ang mga pulis subalit sinalubong umano sila ng putok ng baril ng mga salarin, kaya nauwi sa engkuwentro na sanhi ng pagkamatay ng dalawang suspek.

Suspek sa pagpatay sa isang pedicab driver sa Tondo nitong Sabado, nakuha sa mga salarin ang siyam na plastic sachet ng hinihinalang shabu, isang .45 caliber pistol, at isang .38 caliber revolver.