‘Totoong sports ang wrestling’ -- Robin Sane
MAY dalawang ideyang napag- uusapan sa tuwing nababanggit ang pro-wrestling. Kung ikaw ay tagahanga ng sports, tiyak na sanay ka nang marinig na ito’y palabas lamang.
Ngunit, para sa mga totoong tagasubaybay ng pro-wrestling, batid nilang isa itong mahirap na sports ito at nararapat na bigyan ng respeto.
Ang local promotion na Manila Wrestling Federation (MWF) ang nagpapatakbo ng pro wrestling sa bansa may isang taon na ang nakalilipas at kabilang si Robin Sane sa kanilang top fighter.
“Ang wrestling ay masasabing libangan pagdating sa storylines, drama, rivalries at iba pang kuwento na pupuwedeng mong maisip,” paliwanag ni Sane, “Pero sports ito, tunay na sports kasi kumukuha kami ng magagaling na trainor at conditioning coach,” aniya.
“Nalalagay sa panganib ang mga sarili naming, kaya inaalagaan namin an gaming pangangatawan. Kasama ang diet, gayundin ang conditioning sa mental at physical aspect,” aniya.
Para sa iba, ang pro-wrestling ay pinagsamang teatro at athletics, kaya tinawag na sports-entertainment ni WWE Chairman Vince McMahon.
“Para sa akin, natutuwa ako kung paanong nakikita ng iba ang wrestling kasi minsan nakikita nila ito na parang umaarte lang, minsan naman isang contest. Kaya para sa akin ang wrestling ay sportsentertainment,” sabi ni Sane sa panayam ng Manila Bulletin Sports Online.
“Hindi tulad ng pakikipaglaban para sa pera, ang pro-wrestling ay isang pre-determined sports. Ang kalalabasan ay di na mababago pero ang pagpapakita ng athleticism at ng mismong palabas ay totoo at hindi mga pandadaya. Tulad ng mga karaniwang atleta, ang mga pro-wrestlers ay nasusugatan at nasasaktan din.
“Medyo malabo na ang paningin sa kanang mata ko ngayon. Nabali ko din yung kamay ko sa unang match ko. Sa unang match ko naman sa MWF, nabingkong yung daliri ko pero binalik ko din sa dati. Pati balikat ko na-misaligned,” pagbabahagi ni Sane.
NitongDisyembre, nakipaglaban si Sane sa dating WWE star na si Ho Ho Lun, na sandaling naging bahagi ng NXT matapos makipaglaban sa WWE Cruiseweight Classic tournament. Ang nanalo sa tournament ay ang Fil-Am na si TJ Perkins na kasalukuyang miyembro ng WWE Cruiseweight division.
“Si Ho Ho Lun, napakatotoo at kalmado sa labas ng ring pero kapag nasa loob, napakahirap kalabanin at napakahusay,” sabi ni Sane. Hindi ako makasabay kay Lun kasi isa siya sa pinakamabilis kong nakalaban pero sobrang napagod ako pagkatapos,” aniya.
Ayon kay Sane, totoo ang mga pro-wrestlers at karamihan sa mga performers ng MWF ay marunong makipaglaban.