Hindi kailangan ng magarbong graduation rites—DepEd exec
PINAALALAHANAN
ng Cotabato City schools division office ng Department of Education (DepEd) ang mga magulang, guro at mga school administrator na gawing simple at may kabuluhan ang seremonya ng pagtatapos para sa taong 20172018.
Binigyang-diin ni Dr. Concepcion Ferrer-Balawag, Cotabato City schools division superintendent, ang Department of Education Order No. 25 series of 2017 na naglalaman ng mga panuntunan sa pagsasagawa ng mga programa na nakatakda lamang ganapin sa Abril 2 hanggang Abril 6.
Nagpahayag sa pamamagitan ng lokal na istasyon sa radyo, sinabi ni Balawag na malinaw na nakasaad sa department order ang pagbabawal sa mamahaling damit, marangyang lugar na pagdarausan ng pagtatapos o pagsasagawa ng graduation rites bilang isang oportunidad na makapagsalita ang mga lider sa pulitika, na magiging dahilan upang mapulitika ang kaganapan.
“We can have a simple but meaningful graduation exercises,” pahayag ni Balawag nang manawagan sa mga magulang at guro na sumunod sa direktiba ng departamento.
Sa halip na ituon ang pansin sa pagsasagawa ng magarbong graduation rites, hinimok ni Balawag ang mga guro na mas pagtuunan ang pagtuturo ng kagandahang asal sa mga bata, gaya ng pagiging simple at pagtitipid.
Ipinaliwanag niya na ang lahat ng mga gagastusin sa graduation exercise ay responsibilidad ng paaralan at hindi mula sa kontribusyon ng mga magulang, kabilang ang mga souvenir.
Ang anumang kontribusyon sa taunang yearbook ay dapat na maging boluntaryo, aniya, at idinagdag pa na ang moving up exercise para sa kindergarten ay maaaring ganapin sa loob ng silid-aralan.
Sa temang, “Mag-aaral ng K to 12: Handa sa Hamon ng Buhay (K to 12 Learners: Ready to Face Life’s Challenges),” binibigyang-pansin sa graduation rites ngayong taon ang papel ng K to 12 Basic Education Program, sa paghahasa sa mga abilidad at kakayahan ng mga batang Pilipinong mag-aaral.