‘Oplan Sumvac’ nagbalik sa Aurora
MULING ipinatupad ng Aurora Provincial Police Office (APPO) ang “Oplan Sumvac” para sa paghahanda sa pagdagsa ng mga turista sa iba’t ibang destinasyon sa lalawigan, partikular sa mga resort at iba pang tourist spot sa Baler, Aurora.
Ayon kay Senior Supt. Jonas T. Amparo, APPO provincial director, naka-full alert status na ang kanyang mga tauhan upang masiguro ang kaligtasan ng mga turista at mga residente, gayundin ang maayos na daloy ng trapiko sa mga pangunahing kalsada sa lalawigan.
Sinabi ni Amparo na inatasan na niya si Senior Inspector Ferdinand Usita, ang assistant chief ng APPO Provincial Operation and Plans Branch, na magtayo ng mga police assistance desk at center sa mga convergence point at ilang pasyalan dito.
“The APPO would like to assure the public that sufficient personnel from different units/ stations are on standby ready to respond in any situations,” lahad ni Amparo.
Binanggit na ang kahalagahan ng public social responsibility at kooperasyon ng bawat isa upang makaiwas sa krimen, hinimok niya ang publiko na maghatid ng kapaki-pakinabang at napapanahong impormasyon sa pamamagitan ng iba’t ibang PNP social media account.
“Security measure is our main concern during the summer vacation for local and foreign tourists who will be attending religious and other traditional occasions, and that is the reason why the entire police in the province is all prepared. We also coordinated with other government agencies, non-government organizations and force multipliers due to an early start of summer vacation, which coincides with the observance of Lenten season,” paliwanag ni Amparo.
Dagdag pa niya, nagpulong ang Aurora Peace and Order Council upang talakayin ang mga pagbabago sa ruta sa biyahe bilang paghahanda sa pagdagsa ng mga turista sa lugar.
Ang Aurora ang isa sa mga nangungunang destinasyon sa bansa tuwing panahon ng tag-init, at dinayo ito ng mahigit 1.21 milyong turista noong nakaraang taon.
Sa Baler, na capital ng lalawigan, ilan sa mga destinasyon ng mga turista ay ang Dicasalarin Beach, Digisit Beach, Dimadimalangat Islet, Ermita Park, Lindy’s Point, Local Katipuneros Memorial Marker, Lt. James Gilmore Marker, Lucio Quezon’s Residence, Lukso-Lukso Islets, Moro-Moro Zarsuela, Quezon Memorial Park, Sabang Beach, Aurora Quezon Marker, Aniao Islets, Baler Catholic Church, Museo de Baler, Cemento Beach, at Charlie’s Point.
Ayon pa kay Amparo, bukod sa pagpapatupad ng hakbanging panseguridad, paiigtingin din ng pulisya ng Aurora ang mga espesyal na operasyon laban sa mga kriminal at magsasagawa ng preventive security measures upang ipaabot sa publiko ang posibleng pag-atake ng mga komunistang rebelde at iba pang grupo, na maaaring gamitin ang sitwasyon upang isagawa ang kanilang masasamang plano.