US, magtatayo ng pasilidad sa Pampanga

Sisimulan na ng Amerika at ng Pilipinas ang pagtatayo ng pasilidad sa bansa alinsunod na rin sa Enhanced Defense Cooperation Agreement (EDCA) ng dalawang bansa.

Ito ay nang pangunahan nina United States (US) Ambassador to the Philippines Sung Y. Kim at Department of National Defense (DND) Secretary Delfin Lorenzana ang pagsasagawa ng groundbreaking ceremony ng itatayong Humanitarian Assistance and Disaster Relief warehouse sa Cesar Basa Air Base sa Florida Blanca, Pampanga, nitong Martes.

Ang naturang pasilidad ay magsisilbing imbakan ng kagamitan at supply ng Amerika at Pilipinas upang mapabilis ang kanilang pagtugon at epektibo ang pag-ayuda sa mga humanitarian crisis sa rehiyon.

Sa pahayag ng US Embassy, ang pagpapatayo ng nasabing pasilidad ay isa lamang sa malalaking proyekto ng Amerika at ng Pilipinas na layuning mapatatag pa ang ugnayan ng dalawang bansa.

Mahigpit ang pakikipagtulungan ng Amerika sa gobyerno ng Pilipinas kaugnay ng mga proyekto nito sa hinaharap para sa limang lugar na kinabibilangan ng Cesar Basa Air Base, Fort Magsaysay Military Reservation, Lumbia Air Base, Antonio Bautista Air Base, at Mactan Benito Ebuen Air Base.

Sa ilalim ng kasunduan, maaaring magpadala ng mga sundalo sa bansa ang Amerika sa panahon ng pananatili sa Pilipinas at pinapahintulutan din silang makapagpatayo at makapag-operate ng mga pasilidad sa bansa.

Binibigyan din ng karapatan ng EDCA ang dalawang bansa na mapakinabangan ang kani-kanilang kakayahan sa larangan ng interoperability at modernisasyon na may layuning mapaigting pa ang alyansa ng mga ito.