553,000 turista dumagsa sa Boracay
ILANG BUWAN BAGO PANSAMANTALANG ISARA
Dinagsa ng mahigit kalahating milyong turista ang Boracay Island sa Malay, Aklan ilang buwan bago pansamantala itong isara sa publiko simula sa Abril 26.
Tinukoy ng Malay Tourism Office (MTO) ang naitala nilang 553,074 na turista na dumayo sa isla mula Enero hanggang Marso ng kasalukuyang taon.
Sa nasabing bilang, aabot sa 164,911, o 30 porsiyento ang lokal na turista, habang nasa 78 porsiyento naman ang dumagsang Chinese at Korean.
Sa naturang porsiyento, aabot sa 169,647 ang mga Chinese tourist na mas mataas ng 41 porsiyento kumpara sa 99,911 naitala sa kaparehong panahon noong nakalipas na taon.
Mataas din ang porsiyento ng dumating na Korean tourist na 122,129, kumpara sa 98,782 naitala noong 2017.
Sa kabuuan, aabot sa 376,171 dayuhang turista ang nagbakasyon sa Boracay sa unang tatlong buwan ng taon.
Bahagya rin itong tumaas ng 32 porsiyento kumpara sa 284,878 na naitala noong 2017.
Nakadagdag din sa pag-angat ng porsiyento ng tourist arrival sa bansa ang lumalakas na cruise ship tourism sa bansa, gayundin ang direkta at chartered flights mula sa mainland China, Korea at Taiwan patungong Kalibo International Airport at Caticlan Airport.
Kaugnay nito, posibleng maisailalim na sa state of calamity ang isla ngayong linggo.
Ito ang inihayag ni Presidential Spokesman Harry Roque nang magpatawag siya ng working conference, sa pangunguna ng Department of Tourism (DoT) at suportado ng mga negosyante sa isla.
Idinahilannitonahindimakapagpalabas ng P2.3 bilyong emergency fund ang pamahalaan kung hindi magkakaroon ng state of calamity declaration.
Ang pondo ay gagamitin sa inaasahang pagkakatanggal sa trabaho ng mga manggagawa kasunod ng anim na buwang pagsasara ng isla.
Magpapadala naman ng dalawang barko sa isla ang Philippine Coast Guard (PCG) bilang patrol vessel.
Nakatakdang ipadala sa isla ang BRP Cabra (MRRV 4409) at BRP Davao del Norte (SARV 3503) sa Abril 22.
Tatlong patrol group din ang binuo ng PCG na kinabibilangan ng Special Operations Group, Marine Environmental Protection Command Group at Coastal and Beach Patrol Group.