Fil-Am pambato ng Democrat bilang Texas representative
Nakatakdang gumawa ng kasaysayan si Gina Ortiz Jones bilang unang Filipino-American, unang lesbian at unang Iraq war veteran na iluluklok sa United States Congress matapos manalo sa Democratic nomination para sa 23rd Congressional District ng Texas, nitong Martes.
Tinalo ni Jones, dating U.S. Air Force intelligence officer, ang kapwa Democrat na si Rick Trevino sa runoff contest at awtomatikong umabante sa eleksiyon sa Nobyembre kung saan makakaharap niya ang two-termer incumbent Republican na si Will Hurd.
Noong 2017, nagbitiw sa trabaho si Jones sa Office of United States Trade Representative matapos madismaya sa mga polisiya ni President Donald J. Trump.
Makaraang maggtapos sa Boston University ng BA at MA in Economics, at BA in East Asian Studies, pumasok si Gina sa U.S. Air Force at naging intelligence officer. Ipinadala siya sa Iraq at nagsilbi sa ilalim ng U.S. military’s “Don’t Ask, Don’t Tell” policy.
Sa loob ng 12-taon niya sa military service, umikot ang karera ni Gina sa national security, intelligence, at defense. Nagsilbi siyang adviser sa mga operasyon sa Latin America at Africa.
Bilang sibilyan, nagsilbi siyang Senior Advisor for Trade Enforcement, isang posisyon na nilikha ni President Barrack Obama noong 2012.
Kinilala si Gina bilang 2016 American Council on Germany Young Leader at Council on Foreign Relations Term Member. Miyembro din siya ng Truman National Security Project Defense Council at natamo ang graduate degree sa U.S. Army School of Advanced Military Studies.
Umalis ang ina ni Gina sa Pilipinas para magtrabaho bilang household helper sa United States, para magkaroon ng magandang buhay ang kanilang pamilya at masungkit ang “American dream.”
Sa kanyang personal biography na nakapaskil sa kanyang website, sinabi ni Gina na ang ehemplo ng kanyang ina at mga sakripisyo nito ang nagkintal sa kanyang isipan ng kahalagahan ng humility, hard work, at kahandaaang sumugal para makalikha ng mga oportunidad para sa sarili at sa ibang tao.