Regine delayed ang celebration ng Father‛s Day

MEDYO nalungkot si Asia’s Songbird Regine Velasquez-Alcasid nang malaman niyang nasa Dubai sila nina Christian Bautista at Julie Anne San Jose para sa third leg ng kanilang 3 Stars 1 Heart concert sa June 16. Kinabukasan kasi, June 17, ay Father’s Day.

“Hindi ko pala makakasama ang mag-ama ko, mami- miss ko sila,” sabi ni Regine, tinukoy ang asawang si Ogie Alcasid at anak na si Nate. “Iyon lang ang mahirap, kasi hindi naman puwedeng kasama ko sila lagi. Babawi na lang ako pagbalik namin sa June 17.”

Aalis sina Regine sa June 14 para sa GMA Pinoy TV concert, na gagawin sa Dubai World Trade Center. After ng concert, magkakaroon pa sila ng meet and greet with the fans.

Naitanong na rin namin kay Regine during the pocket interview kung kailan magsisimula ang bago niyang iho-host na talent search ng GMA para sa next solo singing superstar, ang The Clash, na may teaser na sa TV.

“Hindi ko pa sure kung kailan kami magsisimula, pero natapos na namin ang audition. Nagpunta kami sa key cities sa Pilipinas, sa Davao, Baguio, Cebu, at dito sa Metro Manila,” kuwento ni Regine. “Ang daming sumali, ang daming mahuhusay, maraming nakapasok, marami kaming nakuha. Pero wala pa silang ibinigay na exact date kung kailan, pero every Saturday and Sunday magaganap ang talent search.”

Co-hosts ni Regine sa The Clash sina Andi Paras at Joyce Pring. Kabilang naman sa panel of judges si Philippine Comedy Queen Ai Ai delas Alas at si Christian Bautista.