Benepisyong ng tobacco excise tax sa mga magsasaka
BAKAS sa mukha ng mga magsasaka ng Badoc, Ilocos Norte ang saya nang matanggap nila ang mga makinang pangsaka at mga pataba mula sa lokal na pamahalaan, nitong Huwebes.
Nasa 31 traktora at 4,307 sako ng pataba ang ipinamahagi sa lahat ng barangay, na nabili mula sa nalikom na tobacco excise tax sa nasabing bayan.
“Agyaman kami unay kadagitoy a traktor ken abono. Dakkel a tulong kadakami a mannalon (We are thankful for all these tractors and fertilizers. These are great help for us farmers),” ayon kay Luciano Gamayo, residente ng Barangay 13-B, Bato.
Sa ginanap na distribusyon, hinikayat ni Municipal Agriculturist Leonora Escarda ang mga magsasaka na pangalagaan ang mga bagong makinang pangsaka upang masigurong matagal na magagamit ang mga ito.
Bilang bahagi ng kasunduan, ang mga samahan ng mga magsasaka at mga opisyal ng bawat barangay ang magbabantay ng mga traktora habang ang mga empleyado mula sa Municipal Agriculture Office ang magmo- monitor kapag dinala na ang mga ito sa mga barangay.
Nakasaad sa Republic Act 7171 o An Act to Promote the Development of the Farmer in the Virginia Tobacco-Producing Provinces na, “local government units ( LGUs) producing Virginia tobacco are entitled to a 15- percent share of the excise tax collection incremental revenue.”
Sa ilalim ng panuntunan, 30 porsiyento ng halaga ang hahatiin sa mga benepisyaryong probinsiya; 40% sa mga lungsod at munisipalidad ng mga nabanggit na probinsya; at 30% sa mga kabilang na mga lungsod at munisipalidad.
Ayon sa Republic Act 8240 o “An Act amending Sections 138, 140, & 142 of the National Internal Revenue Code, as Amended, and for Other Purposes,” ang mga lokal na pamahalaan na nagsusuplay ng Burley at native na tobacco ay makatatanggap rin ng bahagi na 15% sa kita.
Muli sa bahaging ito, 10% ang mapupunta sa mga benepisyaryong probinsiya; at 90% sa mga kabilang na lungsod at munisipyo na nakabase sa dami ng produksiyon ng tobacco.
Ayon sa panuntunan ng Department of Budget and Management, ang nasabing halaga ay nakalaan para sa kooperatiba, pangkabuhayan, agro-industrial at proyektong imprastruktura na layuning mapaganda ang produksiyon at kalagayan ng mga nagtatanim ng tobacco. Ang dami ay dapat na makatulong sa kapasidad ng LGU na makapaghatid ng pangunahing serbisyo sa kanilang mga nasasakupan.