Ramos, tuloy ang pagtulong sa batang chess players
SINGAPORE -- Patuloy ang pagtulong ni Domingo “Poloy” Razo Ramos sa paghubog ng talento ng mga kabataan sa larangan ng chess.
Si IM Ramos ang 1973 First Pepsi Cola High School Bicol Region Champion ay isang chess teacher at chess coach dito sa Singapore at may chess club din sa Daet, Camarines Norte.
“I love teaching chess,” sabi ni IM Ramos na una munang kinuha ng Japan bilang chess teacher, coach at player bago ang Singapore.
Tinaguriang kauna-unahang Pinoy na nagkampeon sa Asian Junior noong 1980 sa Baguio City tungo sa pagkopo ng International Master (IM) title.
Nakausad sa main draw ng Asian Junior si IM Ramos matapos magkampeon sa isinagawang qualification tournament sa Quezon City para samahan ang iba pang qualifier na sina Andronico Yap, Ricardo de Guzman, Ronald Cusi, Chito Garma, Dick Gicain at Marlo Micayabas.
“Isa si IM (Domingo) Ramos sa mga naunang Bicolano na nagtaas ng bandila ng ating bansa sa pandaigdigang torneo.” sabi ni Maurillo “June” P. Haig Jr. na pangulo ng Naga City Chess Masters Association.
“Isa din siya sa pinakamagaling na chess teacher at chess coach sa ating bansa,” ani pa G. Haig, isa sa mga nakapasa sa examination at seminar ng World Chess Federation (FIDE) kamakailan na ginanap sa Cabuyao, Laguna na nagsilbing punong abala si Dr. Alfred Paez.
Dalawang beses na naging miyembro ng Philippine Team si IM Ramos tungo sa World Chess Olympiad noong 1980 Valleta Malta at 1984 Thesaloniki, Greece at tatlong beses naman kinatawan ang Japan Team bilang board 1 sa World Chess Olympiad noong 1994 Moscow, Russia, 1996 Yerevan, Armenia at 1998 Elista, Kalmykia, Russia.