NCAA Games, nakansela ng bagyong ‘Henry’

SA ikalawang pagkakataon ngayon 94th season, napilitang magkansela ng mga laro ang pamunuan ng National Collegiate Athletic Association (NCAA) para sa kanilang men’s basketball match.

Muling kinansela ng NCAA ang mga larong nakatakda sanang idaos kahapon sa Filoil Flying V Center sa San Juan City dulot ng masamang lagay ng panahon na naging dahilan din ng kanselasyon ng klase sa lahat ng lebel sa buong Kamaynilaan at ilang mga karatig lalawigan.

Kabilang sa mga kinanselang laro sa kumpirmasyon na rin ni NCAA Management Committee chairman Frank Gusi ng season host University of Perpetual Help ang laban ng juniors at seniors squads ng Perpetual at Arellano University, Letran College at Mapua University at ng San Beda University at Jose Rizal University.

Gaya ng nauna ng kanselasyon, muling itatakda ang mga nabanggit na laro pagkatapos ng first round ng elimination ayon kay Gusi.

Magpapatuloy ang mga laro bukas kung magiging maayos ang lagay ng panahon sa pamamagitan ng pagdaraos ng ikalawang NCAA on Tour ngayong season sa Arellano University gym sa Legarda kung saan makakatunggali ng host Chiefs at Braves ang Emilio Aguinaldo College Generals at Brigadiers.

Nagsisimula na ang first period ng laro at lamang ang Junior Altas sa Braves, 21- 19, nang ideklara ang kanselasyon matapos ang malakas na buhos ng ulan na nagdulot ng malawakang pagbaha sa Kamaynilaan.

“Yes, postponed,” sambit ni Gusi.