Paano maiiwasan ang leptospirosis?

SAgitna ng nararanasang mga pag-ulan dulot ng sunud-sunod na bagyo at ng nararanasang habagat, hindi maiiwasan ang mga pagbaha sa maraming lungsod ng Metro Manila at ibang bahagi ng bansa.

Kasabay ng pagdedeklara ng leptospirosis outbreak ng Department of Health (DoH) kamakailan, nagpalabas ang gobyerno ng ilang paalaala upang maiwasan ang naturang sakit.

Sa paalala ng DoH, pinayuhan ni Manila East Medical Center Dr. Claro Cayanan ang mga tao na iwasan ang paglusong sa baha na maaaring kontaminado ng ihi ng mga daga.

Kung hindi naman maiwasan, pinayuhan ni Cayanan ang publiko na gumamit ng bota bilang proteksiyon sa kontaminasyon.

Dagdag pa ng doktor, maaari rin umanong mapigilan ng publiko ang pagdami ng daga sa pamamagitan ng mga mouse trap at lason.

Iminungkahi rin niya ang pagpapanatili ng malinis na kapaligiran sa pamamagitan ng pagsasaayos ng baradong kanal, upang maiwasan ang mga pagbaha sa tuwing panahon ng tag-ulan.

Nag-abiso rin si Cayanan na agad magpakonsulta sa doktor ang mga nilalagnat dulot ng leptospirosis, upang makakuha ng gamot sa sakit.

Ang leptospirosis, na maaaring makamatay kung hindi maagapan, ay mula sa isang bacteria na tinatawag na Leptospira.

Kabilang sa mga sintomas ng leptospirosis ang pagkakaroon ng mataas na lagnat, nilalamig, masakit ang ulo, kasukasuan at mga kalamnan, namumulang mga mata, naninilaw na balat, hirap sa pag-ihi na kulay tsaa.

Maaari itong humantong sa sakit sa atay at bato, myocarditis, acute respiratory distress syndrome, pneumonia, at meningitis.