Pag-uulan ilang araw pa—PAGASA
Maghanda sa tuluy-tuloy na pagulan dahil patuloy na makaaapekto sa buong bansa sa mga susunod na araw ang southwest monsoon o habagat, na pinalakas ng dalawang bagyo.
Ayon kay Shelly Ignacio, weather specialist ng Philippine Atmospheric, Geophysical and Astronomical Services Administration (PAGASA), nakalabas na kahapon sa bansa ang bagyong ‘Karding’, ngunit patuloy nitong palalakasin ang habagat.
Sa huling tala, ang Karding ay nasa layong 905 kilometro sa hilagangsilangang bahagi ng Basco, Batanes, nitong Sabado ng tanghali.
Bukod kay Karding, isang tropical depression na nasa 1,030 kilometro sa kanluran ng extreme Northern Luzon, o nasa labas pa ng bansa, ang magpapalakas din sa habagat bagamat hindi ito inaasahang papasok sa bansa.
Ngayong Linggo, sinabi ng PAGASA na malawakang pag-ulan ang mananaig sa hilagang bahagi ng Luzon, Gitnang Luzon at kanlurang bahagi ng katimugang Luzon.
Partikular na makakaranas ng bahagya hanggang sa malakas na pagulan ang Metro Manila, Ilocos Norte, Ilocos Sur, La Union, Pangasinan, Abra, Apayao, Benguet, Ifugao, Kalinga, Mountain Province, Zambales, Bataan, Tarlac, Pampanga, Bulacan, Cavite, Laguna, Batangas at Rizal.
Habang maulap na may kalat-kalat na pag-ulan at pagkulog at pagkidlat ang mararanasan sa Bicol Region, Western at Eastern Visayas, at Cagayan Valley.
Ang Mindanao at natitirang bahagi naman ng Visayas ay makararanas ng maulap hanggang sa paminsang-minsang pag-ulan.
Samantala, nagpaaalala naman ang PAGASA na isa pang bagyo ang inaasahang mabuo sa silangang bahagi ng Luzon ngayong Linggo o Lunes, na magpapalakas din sa habagat.
Kung sakaling maging bagyo, tatawagin itong ‘Luis’.