Buy-bust sa bar: 31 pinagdadampot
Iba’t ibang uri ng hinihinalang ilegal na droga, drug paraphernalia, at baril ang nasamsam ng awtoridad habang 31 empleyado ng isang bar, kabilang ang manager na umano’y pawang drug suppliers/distributors, ang inaresto sa buy-bust operation sa loob ng nasabing establisimyento sa Makati City, kahapon ng madaling araw.
Isinasailalim sa masusing imbestigasyon sa Makati City Police ang 31 empleyado ng Times Bar, kabilang ang mga waiter at bouncer, partikular ang manager nilang si Danny Rogelio, nasa hustong gulang.
Bukod dito, inimbitahan ng pulisya para tanungin ang 57 dayuhan at 66 local guests ng bar.
Sa inisyal na ulat na ipinarating ni Makati Police Chief, Senior Supt. Rogelio Simon, kay Southern Police District (SPD) Director Tomas Apolinario Jr., nagsagawa ng buy-bust o test-buy operation ang mga tauhan ng Station Drug Enforcement Unit ( SDEU) sa ikatlong palapag ng Times Bar sa Makati Avenue, dakong 3:30 ng umaga.
Sinasabing nakabili umano ang poseur buyer ng P22,500 party drugs sa hindi pa nabanggit na empleyado ng bar.
Nabatid na P2,000 ang sinasabing bentahan ng kada tableta ng party drugs, na agad umanong mabibili ng mga bargoers diretso sa opisina ng manager na si Rogelio, o kaya sa mga waiter at bouncer.
Napasugod naman bandang 9:40 ng umaga si National Capital Region Police Office ( NCRPO) Regional Director Eleazar Guillermo sa naturang bar at inatasan nito ang Makati Police na kumuha ng search warrant sa korte upang tuluyang mahalughog ang mga locker ng mga empleyado at dalawang vault na pinagtataguan umano ng mga bulto ng cocaine.
Kabilang sa mga ebidensiyang nakumpiska ng awtoridad ang hindi pa batid na halaga ng 19 na pakete ng cocaine, 15 ecstacy capsule, apat na ecstacy tablet, isang pakete ng push high-grade marijuana, isang .38 caliber revolver at limang bala nito, P22,500 marked money, at isang CCTV DVR.
Maging ang mga opisyal ng Business Permit Licensing Office ng Makati ay napasugod din sa lugar upang suriin kung may lisensiya at kaukulang permits ang naturang bar.
Nagpapatuloy ang imbestigasyon at follow-up operation ng awtoridad sa naturang insidente.