Social media at video games, ‘nakamamatay’
Naaalarma ang Simbahang Katoliko sa pagdami ng insidente ng pagpapakamatay sa bansa, partikular na sa kabataan.
Ito ang naging reaksiyon ni Manila Archbishop Luis Antonio Cardinal Tagle kasunod ng pahayag ng World Health Organization (WHO) na aabot sa 800,000 katao ang nagpapakamatay kada taon, o halos katumbas ng 40 tao sa bawat segundo.
Natukoy din sa nasabing pag-aaral na karamihan sa kabataang nasasangkot sa parehong insidente ay nasa edad 15-29.
Dahil dito, nanawagan si Tagle sa mga magulang na bantayang mabuti ang kanilang mga anak laban sa “nakakalasong pagkain”.
Ipinaliwanag ng Cardinal na hindi lamang ito basta mgapisikal na pagkain, kundi maging mga “pagkaing” humuhubog sa kaisipan ng kabataan, katulad ng social media, mga pelikula, at video games.
Paalala pa ng Cardinal sa publiko, mahalagang mabantayan ang mga bagay na “kinakain” ng isang indibidwal dahil nagiging bahagi ito ng sistemang bumubuo sa katauhan.
Iginiit ni Cardinal Tagle na bukod sa pagpili ng mga pagkaing masustansiya at makabubuti para sa tao, kailangang bantayan din ang mga pagkaing nakalalason sa katawan, isip, at katauhan.
Aniya, labis na nakaaalarma ang pagdami ng nagpapakamatay, at higit pang nakababahala na karamihan sa mga ito ay abataan.
“Nakakaalarma baka mayroon silang mga nakakain, ano kaya ‘yang nakakain, pinakakain ng social media, pinapakain ng kung anong pelikula, kahit mga video games na pumapasok na sa sistema nila. Hindi lang ‘yong pagpatay sa kapwa e, pati na sarili puwede nang patayin,” bahagi ng sermon ni Tagle nang magmisa siya sa pagbabasbas sa bagong Oratoryo ng San Carlos Seminary Pre-College Department, kamakailan.