Magparehistro para makaboto sa 2019

Nakiusap ang isang opisyal ng Catholic Bishops’ Conference of the Philippines (CBCP) sa kabataan na magparehistro na upang matiyak na makaboboto sa mid-term elections sa Mayo 13, 2019.

Sinabi ni Fr. Conegundo Garganta, executive secretary ng CBCP- Episcopal Commission on Youth (ECY), dapat na samantalahin ng bawat isa ang pakikibahagi sa halalan na parte ng pantay na karapatan ng bawat mamamayan sa isang demokratikong bansa.

Aniya, sa pamamagitan nito ay mas madidinig at magkakaroon ng puwang ang mga komento ng bawat isa sa paraan ng pamamahala ng mga halal na opisyal.

“I think the participation in the elections, specially preparing themselves by registering as a voter will do more good especially for the country and then also for their opinion and for their feedback and comments to be properly counted, we are a democratic country and this is one way of enjoying our democracy where we use our right for suffrage so it is good for young people to consider registering in preparation for the coming elections,” anito.

Naniniwala rin ang CBCP na hindi dapat na balewalain ang kasagraduhan ng pagboto dahil ito’y mahalagang sangkap ng demokrasya at unang hakbang para sa pagbabago ng lipunan.

Simula pa nitong Hulyo 2 ay nagdaraos na ang Commission on Elections (Comelec) ng voters registration sa bansa para sa mid-term polls, at tatagal ito hanggang sa Setyembre 29, 2018.