4 na SUV, truck sa R7- B shabu, tinutugis na

Pinaghahanap na ng Philippine Drug Enforcement Agency (PDEA) ang isang container truck at apat na sports utility vehicle (SUV) na pinaniniwalaang nagpuslit ng halos P7 bilyon shabu sa isang bodega sa Cavite, kamakailan.

Ito ang pahayag kahapon ni PDEA Director Aaron Aquino matapos nilang masilip ang kuha ng closed-circuit television (CCTV) camera sa Barangay F. Reyes, General Mariano Alvarez sa Cavite.

Ang mga nabanggit na sasakyan, aniya, ay labas-pasok sa warehouse ng Sunnyfields Enterprises sa naturang lugar.

Sa paunang pagsisiyasat ng PDEA at pulisya, Mayo ngayong taon nang sinimulang upahan ang nasabing bodega ng P150,000 kada buwan.

Pagsapit ng Hulyo, sunud-sunod na dumating ang mga kargamento.

“Dumating ang Chinese syndicates sa naturang warehouse nitong Hulyo 13 at idiniskarga ang mga ilegal na droga nitong Hulyo 15 sa loob lamang ng 3-4 oras,” ayon kay Aquino.

Nitong Agosto 9, nadiskubre ng PDEA ang apat na malalaking magnetic lifter na dati umanong pinaglagyan ng isang toneladang shabu na nainspeksiyon ng K-9 unit.

May kinalaman, aniya, ang kanilang nakumpiska sa mahigit P4 bilyon halaga ng shabu na nasabat sa Manila International Container Terminal (MICT) kamakailan dahil sa pagkakatugma ng mga kable at packaging nito.

Naglabas na rin, aniya, ang PDEA ng litrato ng umano’y liaison officer ng pinaniniwalaang international drug syndicate na “Golden Triangle” na si Chao Yue Wah.