Pederalismo ‘ di dapat madaliin— Malacañang
Mas mainam umanong magsagawa ng diskusyon tungkol sa pederalismo sa halip na madaliin ang implementasyon nito at kakitaan ng problema.
Ito ang pahayag ni Presidential Spokesperson Harry Roque matapos maglabas ng pangamba ang mga economic managers ni Pangulong Duterte hinggil sa isinusulong na Charter change, dahilan upang manawagan ang isang miyembro ng Consultative Committee ( ConCom) para sa dismissal ng nasabing mga opisyal.
Sa isang panayam sa radyo, sinabi ni Roque na nais lamang ni Finance Secretary Carlos Dominguez III na ilatag ang mga concerns nito hinggil sa draft ng federal charter ngunit hindi umano ito kontra sa pagpapalit ng pederal na pamahalaan.
“So hindi naman po tinutuldukan ‘no, sinasabi lang na kinakailangan pag-aralan pa at tingnan iyong aspeto ng financial ramification,” sabi ni Roque.
“Si Secretary Dominguez ay isa po iyan talaga na aktibo na nagsulong ng kandidatura at plataporma ni Presidente para sa pederalismo ay nananatili siyang naninindigan para sa pederalismo, kaya lang kinakailangan iyong detalye ay kinakailangan talagang plantsahin,” dagdag pa niya.
Sinabi rin ni Roque na ang mga pag-uusap tungkol sa pederalismo ay mahalaga upang agad na maayos ang mga isyu sa halip na problemahin ito kapag naipatupad na.
“Siguro ang pagmamadali po ay huwag naman iyong parang magresulta sa mas malaking danyos,” giit ni Roque.
Samantala, siniguro naman ni Roque na nakatuon pa rin si Pangulong Duterte sa implementasyon ng draft ng federal charter na binuo ng ConCom.
Ayos lamang din umano sa Pangulo na ipahayag ng mga economic manager ang kanilang pangamba tungkol sa draft.
“Hindi naman po (galit). Ang Presidente naman ay naniniwala sa malayang pananalita,” ani Roque.
Una nang nananawagan si ConCom member Father Ranhilio Aquino sa Pangulo na sibakin sina Dominguez at Socioeconomic Planning Secretary Ernesto Pernia dahil umano sa problema ng mga ito sa pederalisno.