Duterte, dadalo sa WEF sa Vietnam
Inaasahang dadalo si Pangulong Rodrigo Duterte sa tatlong araw na World Economic Forum (WEF) na idadaos sa Hanoi, Vietnam, sa susunod na buwan.
Sa inilabas na pahayag ng WEF, isa lamang si Duterte sa mga state leaders na makikibahagi sa nasabing pagtitipon, na gaganapin sa Seytembre 11-13.
Inihayag ng WEF na sa ngayon ay walo pa lamang na bansa sa Southeast Asia ang kakatawanin ng kanilang mga top leader, kabilang na rito si Vietnamese Prime Minister Nguy n Xuân Phúc.
Inaasahang makakadaupangpalad ng Pangulo ang kahahalal na
Prime Minister ng Malaysia na si Mahathir Mohamad na binisita niya sa Kuala Lumpur nitong nakaraang buwan.
Gayunman, hindi pa makumpirma ng Malacañang ang pagdalo ng pangulo sa WEF, na magaganap isang linggo pagkatapos ng tatlong araw na makasaysayang pagbisita ni Duterte sa Israel sa susunod na buwan din.
Ayon sa WEF, ang nasabing pagpupulong ay may temang “ASEAN 4.0: Entrepreneurship and the Fourth Industrial Revolution” kung saan kakatawanin ng mga prime minister, presidente o state counselor ang walong bansa na kasapi ng Association of South East Asian Nations (ASEAN).
Kabilang sa nagkumpirma ng pagdalo sa WEF sina Cambodian Prime Minister Hun Sen, Indonesian President Joko Widodo, Laos Prime Minister Thongloun Sisoulith, Myanmar State Counsellor Aung San Suu Kyi, Singaporean Prime Minister Lee Hsien- Loong, at Sri Lankan Prime Minister Ranil Wickremesinghe, kasama ang mga senior cabinet ministers ng Republic of Korea, Thailand at iba pang bansa.