2 holdaper-carnapper, tigok sa bakbakan

Dalawang lalaki, na umano’y nagtangkang mangholdap ng isang gasolinahan at nangarnap ng motorsiklo ng mga customer nito, ang namatay makaraan umanong manlaban sa mga umaarestong pulis sa Antipolo City, Rizal, nitong Biyernes ng gabi.

Sa ulat ni Rizal Police Provincial Office (RPPO) Director Senior Supt. Lou Frias Evangelista kay Police Regional Office (PRO)-4A Director Chief Supt. Edward Carranza, inaalam pa nila ang pagkakakilanlan ng mga napatay na suspek.

Batay sa ulat ng pulisya, dakong 11:00 ng gabi nang mangyari ang engkuwentro sa Blue Mountain sa Barangay Sta. Cruz, Antipolo City.

Nauna rito, tinangka umano ng mga suspek na holdapin ang Shell gasoline station sa Marcos Highway sa Bgy. Sta. Cruz, pero sa hindi pa batid na dahilan ay nabigo sila kaya pinagbalingan na lang nila at tinangkang tangayin ang motorsiklo ng dalawang kostumer, na noon ay nagpapagasolina, saka tumakas.

Nagkataon namang nagpapatrulya sa lugar ang mga tauhan ng Antipolo City Police, at may nakapagbigay ng impormasyon tungkol sa holdapan.

Sa checkpoint ng mga pulis ay hinabol nila ang mga suspek, hanggang sa makorner sa Blue Mountain, pero sa halip na sumuko ay nanlaban umano ang mga ito, kaya napilitang gumanti ng putok ang mga pulis, na nagresulta sa kamatayan ng mga suspek.

Narekober ng mga pulis mula sa pinangyarihan ng engkuwentro ang motorsiklong kinarnap umano ng mga suspek, gayundin ang dalawang baril.