Environment-friendly evacuation hub, itatayo sa Batangas

PINAGHAHANDAAN

na ng probinsiyal na pamahalaan ng Batangas ang pagtatayo ng isang environment-friendly at multi-functional Batangas Capitol Evacuation Center, matapos ang pormal na groundbreaking rites sa provincial government complex, kamakailan.

Sinabi ni Batangas provincial public information office chief Jenelyn A. Aguilera na may lawak na 3000 metro kuwadrado ang proyektong evacuation center, at kayang kumupkop ng nasa 3,000 evacuees sa panahon ng kalamidad o sakuna.

Ayon kay Aguilera, pinamunuan mismo ni Batangas Governor Hermilando Mandanas ang proyekto katuwang ang mga pinuno ng mga departamento, partikular ang Provincial Disaster Risk Reduction and Management Office, Engineer’s Office, Social Welfare and Development Office, Health at key units.

Aniya, nagkakahala ang proyekto ng P60 milyon na inaasahang matatapos sa buwan ng Disyembre habang nakatakda namang pormal na buksan sa Marso 2019.

“Mahigpit ang tagubilin ng gobernador na gawing environment-friendly ang proyekto, at dahil dito, ipinagbilin nito na walang puno ang mapuputol sa konstruksyon at komplesyon ng naturang proyekto,” pahayag ni Provincial Engineer Gilbert Gatdula.

Pagbabahagi ni Gatdula, ang disenyo ng evacuation center ay kakikitaan ng multi-purpose convertible tulad ng covered park, assembly area at recreation activity center kasama ang mga pasilidad na pangunahing kailangan.

Dagdag pa ni Aguilera na bukod sa ‘vital disaster risk reduction and management operations,’ ng pasilidad, ang loob nito ay pupunan ng mga LED monitors upang magbigay ng ‘indoor entertainment’ para sa publiko. Magkakaroon din ito ng standby heavy-duty general purpose generator, na kayang magkaloob ng kuryente sa buong Capitol complex sa oras na mawalan ng kuryente.