Pacquiao, pinuna ng CBCP

BINATIKOS ng Catholic Bishops Conference of the Philippines (CBCP) si boxer-senator Manny Pacquiao dahil umano sa maling interpretasyon nito sa Bibliya tungkol sa death penalty o hatol na kamatayan.

Sinabi ni CBCP Commission on Prison Pastoral Care Executive Secretary Rodrigo Diamante na mali ang pagkakaintindi ng boksingero sa Roman 13 ng Bibliya, na pinahihintulutan ng Diyos ang pagpapataw ng kamatayan sa gumagawa ng heinous crimes.

Pabor si Pacquiao sa capital punishment basta ang krimen ay heinous o kasuklam-suklam, lalo na ang mga krimen na gawa ng mga sugapa sa illegal drugs, na bukod sa nanggagahasa ay pinapatay pa ang biktima.

Kunsabagay, may katwiran dito ang boksingerong senador sapagkat talagang nakagagalit ang kahayupan ng drug addicts at gahaman sa laman. Gayunman, naniniwala ang Simbahang Katoliko, sa pamamagitan ni Pope Francis, na sinumang kriminal o masamang tao ay puwede pa ring magbago.

Dinunggol ako ng kaibigang palabiro pero sarkastiko: “Dapat ay mag-focus na lang si Pacquiao sa boksing. Hindi siya dapat maginterpret sa Bibliya. Hindi naman siya pari o kaya ay pastor.” Tumangotango si senior-jogger na umiinom ng kape.

Tama si kaibigan. Paghusayin na lang ang sarili sa larangan ng boksing. Kinilala at hinangaan siya rito ng mga Pinoy hindi sa pagiging pastor o tagainterpret ng Bibliya. Ibigay niya ang pagbibigay ng interpretasyon sa mga pari at Bible scholar sapagkat ito ay ibang-iba sa larangan ng boksing. oOo

Patuloy na itinutulak ng Duterte administration ang pangalawang yugto ng Tax Reform for Acceleration and Inclusion o TRAIN 2 sa kabila ng pag-angal ng mga mamamayan sa dulot na pahirap ng TRAIN 1.Binigyan nila ito ng bagong pangalan: TRABAHO o Tax Reform Package for Attracting Better and High Quality Opportunities.

Layunin ng panukala na ibaba ang corporate income tax sa 20% mula sa kasalukuyang 30%. Subalit baka hindi alam ng economic experts o managers ni PRRD na lalong naghihirap ang ordinaryong mamamayan bunsod ng patuloy na pagtaas ng pangunahing bilihin at serbisyo. Natatandaan ko noon, kapag nagmungkahi ang PNoy economic managers ng bagong buwis, agad umaalma si Budget Secretary Benjamin Diokno at binibira ang PNoy administration. Ngayon, si Diokno mismo, kasama ang iba pang economic managers ang nagsusulong sa TRAIN 2. oOo

Nabulabog ang “kangkungan” sa ipinalabas na video ni Presidental Communications Operations Office (PCOO) Assistant Secretary Mocha Uson tungkol sa pederalismo, na isinusulong mismo ni Pangulong Duterte.

Dapat daw mag-isyu ng public apology si sexy Mocha dahil umano sa malaswa at bastos na pederalismo video, kasama ang isang male blogger na sumasayaw at kumakanta ng I-PEPE, I- DEDE mo. Ayon kay Philippine Information Agency Chief Harold Clavite, nakasisira sa federalism campaign si Mocha.

Maging ang mga senador ay nalaswaan sa ginawang ito ni Mocha kung kaya dapat daw na manahimik na lang si Uson tungkol sa isyu ng pederalismo. Mr. President, kumibo ka naman!