NAIA makupad tumugon sa insidente
Inilarawang bangungot ang aksidente ng eroplano ng Xiamen, na nagresulta sa pagkakaantala at kanselasyon ng daan-daang flights, sinabi kahapon ng chairman ng House Committee on Transportation na kailangan na talagang magkaroon ng paliparan sa labas ng Metro Manila para mabawasan ang pagsisiksikan sa Ninoy Aquino International Airport (NAIA).
Nagpahayag din ng pagkadismaya si Catanduanes Rep. Cesar Sarmiento sa paghawak ng airport authorities sa insidente, na maaari sanang maiwasan.
“This could have been prevented kung ang NAIA and other airports authorities, particularly the DOTr, could have anticipated this particular incident. Yong mga skidding naman eh nangyayari naman ‘yan even in the past or even in other jurisdictions. But don sa pagdating ng ganitong sitwasyon, immediate dapat ang response ng ating authorities para maiwasan,” aniya sa panayam sa radyo.
Sinabi niya na “imperative” na magsagawa ng imbestigasyon upang matiyak na hindi na maulit ang ganitong “nightmare”.
“So ang pinaka-practical na idea d’yan is to move out. Create another airport para it will bring convenience and comfort and avoid traffic in Metro Manila,” sabi ng House leader.
Hiniling naman ni Bayan Muna Rep. Carlos Isagani Zarate ang agarang pag-aapruba sa House Bill 2782 o ang “Magna Carta of Airline Passengers Bill of Rights.”
Samantala, nais ni Senador Grace Poe na silipin ang P350 bilyon halaga ng rehabilitasyon ng NAIA.
“We will give time for airport authorities to have a complete report on the effects of the runway closure during and after the incident,” ani Poe.
Libu-libong pasahero ang naperwisyo nang sumadsad sa NAIA ang Xiamen Flight MF8667 nitong Huwebes, at nagdulot ng pagkaparalisa ng operasyon ng paliparan.