Pinoy gymnasts, aarangkada
JAKARTA — Kumpiyansa sina Asian Games rookies Carlos Edriel Yulo at Reyland Capellan sa kanilang kampanya na makapaag-uwi ng medalya sa gymnastics na magsisismula ngayon sa Jakarta International Expo Kanayoran Hall D. Sasabak ang 18-anyos na si Yulo, tinaguriang the prince of the Palarong Pambansa, para tumbasan ang suporta ng pamahalaan at ng Gymnastics Association of the Philippines (GAP).
“I am ready this time at gusto ko pong maipakita ang buong makakaya ko para makapagwagi ng medalya para sa bansa,” sambit ni Yulo, silver medalist sa floor exercise sa 2018 Doha World Cup at bronze sa vault sa Melbourne World Cup Gymnastics 2018 sa Australia.
Nagwagi rin siya ng silver sa vault sa Baku World Cup 2018 sa Azerbaijan.
Lalaban naman si Yulo sa individual all-around, horizontal bar, pommel horse, parallel bars, vault, rings at paborito niyang floor exercise.
Nais patunayan ni Capellan, gold sa floor exercise at bronze sa vault sa nakalipas na Kuala Lumpur Southeast Asian Games, na karapat-dapat siya sa Asiad slots.
“Handa na po akong makipagsabayan sa kanila,” sambit ni Capellan, debutante sa Asiad tulad ni Yulo.
Lalaban lamang si Capellan sa vault at floor exercise.
Kasama rin sa team si Jan Gwynn Timbang, na sasabak sa vault, rings, horizontal bar, pommel horse, parallel bars at floor exercise.
Panlaban ng bansa sa Women’s Artistic Gymnastics sina Ma. Cristina Onofre (balance beam, floor exercise, vault and uneven bars), Carinne Leanne Bunagan (balance beam, floor exercise, vault and uneven bars) at Shieldannah Sabio at Marian Nicole Medina (individual all-around).