70-anyos hit-and-run suspect, dinakma sa NAIA
Patay ang isang 17-anyos na estudyante habang sugatan ang dalawang babae sa hit-and-run accident sa kahabaan ng Roxas Boulevard corner Pedro Gil sa Ermita, Maynila, nitong Lunes ng madaling araw.
Sa inisyal na imbestigasyon, tumatawid ang biktimang si Jeremiah Erwin Tan sa northbound lane ng Roxas Boulevard nang masalpok ng sasakyan, dakong 1:30 madaling araw.
Gayunman, iniulat na hindi bumaba mula sa sasakyan ang suspek at humarurot patungo sa hindi batid na direksiyon.
Si Tan, freshman Accountancy student sa isang unibersidad sa Maynila, ay nagtamo ng mga sugat sa katawan sa pagkakatilapon sa konkretong kalsada at isinugod sa ospital pero huli na ang lahat.
Samantala, agad na rumesponde ang mga Philippine Red Cross volunteers sa lugar upang magbigay ng paunang lunas ngunit hindi naman malubha ang dalawang babae.
Ayon sa mga saksi, beating the red light ang suspek na sakay sa sasakyan na may plakang TQR-245.
Nang beripikahin ng awtoridad ang plaka, sinabi ng Land Transportation Office (LTO) na ang sasakyan ay pag-aari ng Sun Fortune, Inc. na matatagpuan sa Malanday, Valenzuela.
Kalaunan, napag-alaman ng mga tauhan ng Manila Police District (MPD) Traffic Enforcement Unit na ang 70-anyos na driver ay lilipad na pa-Hong Kong nitong Lunes ng hapon.
Si Victor Kung, Chinese at consultant ng isang textile company sa Valenzuela City, ay papunta nang Ninoy Aquino International Airport Terminal 2 nang arestuhin ng mga tauhan ng MPD sa boarding gate. Delayed ang kanyang flight.
Tumanggi ang suspek na magbigay ng pahayag ngunit sinabi ng mga pulis na may sakit si Kung.
Si Kung ay mahaharap sa kasong reckless imprudence resulting in homicide.