Davao solon magpapa-check up sa Singapore, Thailand
Pinayagan ng Sandiganbayan na makabiyahe si Davao Del Norte Rep. Antonio "Tonyboy" Floirendo, Jr. sa Singapore at Thailand upang sumailalim sa medical check up, simula Agosto 22-28.
Sa isang resolusyon ng 6th Division ng anti-graft court, pinaboran nito ang mosyon ng kongresista matapos itong pumayag sa inilabas nitong mga kondisyon.
Ayon sa hukuman, maaari lamang lumabas ng bansa si Floirendo, mula Agosto 22-28.
Isasailalim si Floirendo sa medical check up ni Dr. Cheng Jun ng Cheng Jun Gastroenterology & Medical Clinic Singapore, sa Agosto 23 at 24.
Habang nasa Singapore, pansamantalang manunuluyan ang kongresista sa Grand Hyatt.
Pagkatapos nito sa Singapore, magtutungo naman ito sa Bangkok, Thailand para sa medical checkup nito sa TICEBA GmbH and Miskawaan Health Group, simula Agosto 25-27.
Ayon sa korte, bukod sa nasabing health care company, manananitili lamang si Floirendo sa Mandarin Oriental habang ito ay nasa Thailand.
Nagbigay na rin ng travel bond na P60,000 ang kongresista.
Si Floirendo ay nahaharap sa kasong paglabag sa Section 3(h) ng Republic Act 3019 (Anti-graft and Corrupt Practices Act) dahil sa pagkakaroon nito ng financial interest sa pagkakadawit nito sa venture agreement sa pagitan ng Bureau of Corrections (BuCor) at Tagum Agricultural Development Company (TADECO) na pag-aari ng pamilya nito noong 2003.