Impeachment hearing, next week na
Itinakda ng Kamara sa Miyerkules, Agosto 29, ang impeachment hearing laban sa pitong mahistrado ng Supreme Court (SC), ayon kay House Majority Leader at Camarines Sur Rep. Rolando Andaya Jr.
Sinabi ni Andaya, chairman ng House Committee on Rules, na itinakda ang pagdinig sa Miyerkules, isang araw matapos ang referral ng plenaryo ng reklamong impeachment sa House Committee on Justice, na pinamumunuan ni Oriental Mindoro Rep. Paulino Salvador “Doy” Leachon.
“Yes, it will be so,” pagkumpirma ni Andaya sa text message nang tanungin kung agad bang tatalakayin ng panel ni Leachon ang impeachment complaints kapag naisama na ito sa Order of Business sa Martes para sa plenary referral sa justice committee, na dating pinamumunuan ni Oriental Mindoro Rep. Reynaldo Umali.
Gayunman, sinabi ni Leachon na maaaring isagawa ng kanyang panel ang pagdinig “on September 3 at the earliest”, dahil kailangan muna nilang pag-aralan ang mga dokumentong isinumite sa kanila kaugnay ng reklamo.
“Granting referral to Justice Committee on Tuesday by the Speaker at the plenary, I’ll meet the Committee Secretariat and look over the documents. [Maaaring gawin ng panel ang pagdinig sa] September 3 at the earliest,” ani Leachon.
Una nang inihayag ni House Speaker Gloria Macapagal Arroyo na maisusumite ng plenaryo sa komite ni Leachon ang nasabing mga reklamo sa Martes.
“We can’t proceed Wednesday without first looking into the records of those complaints,” paliwanag naman ni Leachon. “On Thursday, we have no session. I’ll ask the Speaker if she’ll allow us even without session, much the better. If not, [gagawin ang hearing sa] Monday (Setyembre 3).”
Inaprubahan nitong Biyernes ni Speaker Arroyo ang pagpapabilis sa impeachment process laban kina SC Justices Teresita de Castro, Diosdado Peralta, Lucas Bersamin, Andres Reyes, Francis Jardeleza, Noel Tijam, at Alexander Gesmundo, upang hindi maapektuhan ang legislative agenda ng Kamara.
Naghain nitong Huwebes ng reklamong impeachment sina Albay Rep. Edcel Lagman, Magdalo Party-list Rep. Gary Alejano, Ifugao Rep. Teddy Baguilat, at Akbayan Party-list Rep. Tom Villarin laban sa pitong mahistrado, na inaakusahan nila ng paglabag sa Konstitusyon sa pagpapatalsik kay dating Chief Justice Maria Lourdes Sereno sa pamamagitan ng quo warranto petition, at betrayal of public trust.