Honasan ipinasususpinde

Isang mosyon ang inihain ng Office of the Special Prosecutor para suspendihin si Senador Gringo Honasan kaugnay ng dalawang kaso ng graft na kinakaharap nito sa Sandiganbayan Second Division.

Una nang kinasuhan si Honasan ng paglabag sa Section 3(e) ng AntiGraft and Corrupt Practices Act (RA 3019) hinggil sa umano’y maling paggamit ng kanyang P29.1-milyon Priority Development Assistance Fund (PDAF) noong 2012.

Sa inihaing mosyon, tinukoy ng prosekusyon ang Section 13 ng RA 3019, na nagsasaad na sinumang incumbent public officer na nasasakdal sa anumang tiyak na impormasyong may kinalaman sa pandaraya sa pondo ng pamahalaan o publiko ay dapat na suspendihin ng Sandiganbayan.

Kinasuhan si Honasan sa paggastos umano sa kanyang PDAF para sa National Council of Muslim Filipinos (NCMF) noong Abril 2012, sa layuning magkaloob ng proyektong pangkabuhayan para sa mga Pilipinong Muslim sa Metro Manila at Zambales.

Hunyo 2012 nang inendorso umano ni Honasan ang Focus Development Goals Foundation, Inc. bilang implementing non-government organization (NGO), pero nadiskubre ng Office of the Ombudsman na ang nasabing pag-endorso ay walang benefit compliance sa regulasyon ng procurement.