30 pamilya nasunugan sa faulty electrical wiring
Apat ang sugatan habang mahigit 30 pamilya ang nasunugan sa pagsiklab ng apoy sa isang residential area sa Parañaque City, kamakalawa ng gabi.
Agad na isinugod sa ospital ang apat na nasugatang residente, hindi pinangalanan, na pawang nagtamo ng galos sa katawan dahil sa pagmamadaling isalba ang kani-kanilang gamit.
Sa inisyal na ulat ng Parañaque Fire Department, sumiklab ang apoy sa isang bahay sa Seaside, Barangay Tambo sa nasabing lungsod, dakong 7:00 ng gabi.
Mabilis na kumalat ang apoy at natupok ang 15 bahay na pawang gawa sa light materials.
Umabot sa ikatlong alarma ang sunog bago naapula dakong 10:00 ng gabi.
Tinatayang nasa P150,000 halaga ang naabong ari-arian habang faulty electrical wiring ang sinisilip na sanhi ng insidente.