Drug surrenderer nirapido

Patay ang isang helper nang pagbabarilin ng hindi pa nakikilalang suspek sa loob ng isang computer shop sa Malabon City, kamakalawa ng gabi.

Dead on the spot si Paul Juan Ang, 37, ng No. 219 Hernandez Street, Barangay Catmon ng nasabing lungsod, dahil sa mga tama ng bala ng cal. 45 sa katawan.

Base sa ulat, abala sa paglalaro ng computer ang biktima sa loob ng isang computer shop na matatagpuan sa Block 29, Lot 13, Peoples Coalition for Housing sa Hernandez St., dakong 8:00 ng gabi.

Pumasok sa loob ng shop ang dalawang lalaki at isa sa mga ito ang tumayo sa pintuan habang ang isa ay lumapit kay Ang saka pinagbabaril.

Kumaripas ang mga suspek matapos bumulagta ang biktima.

Narekober sa pinagyarihan ang limang basyo ng cal 45.

Ayon sa mga kaanak ng biktima, tumigil na si Ang sa pagtutulak ng ilegal na droga at sumuko na sa “Oplan Tokhang”.

Patuloy ang imbestigasyon sa insidente.