200 kilong isdang may formalin, nasabat
Aabot sa 200 kilo ng imported frozen fish na umano’y may formalin ang nasabat ng mga tauhan ng Office of the City Agriculturist (OCA) ng San Fernando City sa La Union, nitong Biyernes ng hapon.
Ayon kay Florycel Obeña, ng OCA, nasamsam ang naturang frozen fish products sa Wet Market Auxiliary ng lungsod, alinsunod na rin sa kautusan ng Bureau of Fisheries and Aquatic Resources (BFAR)-Regional Office 1.
Dahil dito, ipinagbabawal na muna ng pamahalaang lungsod ang pagpasok ng mga imported na isda na kinabibilangan ng galunggong, hipon, pusit, alimasag at iba pang lamangdagat na nagmumula sa Urdaneta, Dagupan, at Bonuan sa Pangasinan.
Kaugnay nito, lalo pang pinaigting ng BFAR ang kanilang kampanya laban sa illegal fishing upang hindi na dumagsa ang mga frozen na isda sa merkado.
Sa isang panayam, sinabi ng isang fish vendor na ilang dekada na silang nagtitinda ng iba’t ibang uri ng frozen na isda ngunit hindi sila pinagbabawalan at wala ring kahit isang mamimili na nagrereklamo.