Nagtangkang pumatay sa kapitan, tiklo
Nasa kustodiya na ng Police Regional Office 2 (PRO 2) ang umano’y suspek sa tangkang pagpatay sa isang barangay chairman ng Enrile, Cagayan, matapos itong maaresto nitong Biyernes.
Nahaharap sa kasong frustrated murder si Nomeric Arce, 27, ng Barangay Ballayangon, Pinukpuk, Kalinga, dahil sa umano’y pananambang kay Barangay Liwan Norte chairman Rodrigo Magbitang, kamakaikan.
Sa pagsisiyasat ng Enrile Police Station, sakay sa kanikanilang motorsiklo, pauwi na ang biktima, kasama ang kanyang mga tanod, mula sa Sitio Birung nang pagbabarilin ng suspek, nitong Huwebes ng umaga.
Isinugod sa ospital ang biktima dahil sa mga tama ng bala sa katawan.
Nakumpiska sa suspek ang isang calibre .45 pistol at mga bala nito at hindi pa madeterminang halaga ng umano’y shabu.