Laging pinagagalitan, sinaksak si nanay

Habang isinusulat ito, nasa kritikal na kondisyon ang isang 51-anyos na ina makaraang saksakin ng kanyang 19anyos na anak nang magtalo sa depektibong telebisyon sa Quezon City nitong linggo.

Kinilala ng Quezon City Police District-Batasan Police Station (PS-6) ang biktima na si Cornelia Borja, at kanyang anak, si Hakkinin, kapwa residente ng Barangay Bagong Silangan.

Ayon sa kakambal ng suspek, si Honey Gen, katatapos lamang nilang maghapunan sa kanilang tahanan sa Road 9, Bonifacio Extension, at nakatakdang manood ng telebisyon dakong 7:00 ng gabi.

Gayunman, nagalit si Cornelia dahil walang sounds ang kanilang telebisyon at sinigawan si Hakkinin na ayusin.

Habang sinisigawan ni Cornelia ang kanyang anak, tumakbo si Hakkinin sa kanilang kusina at kumuha ng kutsilyo at dalawang beses sinaksak sa balikat ang kanilang ina.

Umalis si Hakkinin sa bahay nang makitang duguan ang kanilang ina habang nagpasaklolo si Honey Gen at isinugod ang biktima sa ospital kung saan ito kasalukuyang nakaratay.

Samantala, agad na nagsagawa ng follow-up operation ang mga tauhan ng PS-6 at naaresto si Hakkinin.

Inamin nito ang krimen at sinabing palagi siyang pinagagalitan ng kanyang ina.

Kinasuhan ang suspek ng frustrated parricide.