De Castro, mas matimbang ang karanasan

Ibinasura ng Malacañang ang mga alegasyon na ang appointment ni Chief Justice Teresita Leonardo-De Castro ay pabuya sa pagsusuporta nito sa pagpapatalsik kay Maria Lourdes Sereno mula sa Supreme Court.

Dinepensahan ni Presidential Spokesman Harry Roque ang appointment ni De Castro, sinabing siya ang pinaka- senior sa listahan ng mga nominadong isinumite ng Judicial and Bar Council (JBC).

“Wala pong saysay ‘yan. PRRD upheld judicial professionalism by appointing most senior of aspirants,” reaksiyon ni Roque sa mga alegasyon na political reward ang paghirang kay De Castro.

Iginiit ni Roque na si De Castro “[has] infinitely more experience” kaysa mga nakababata sa kanya.

Hinirang ni Pangulong Duterte si Associate Justice De Castro bilang bagong Chief Justice mula sa JBC shortlist. Aabutin lamang ng 41 araw ang termino dahil nakatakda na siyang magreretiro sa Oktubre sa pagsapit niya sa mandatory retirement age na 70 taong gulang.

‘SHORTSIGHTED’

Sinabi ni Senator Risa Hontiveros na ang termino ni Chief Justice De Castro marahil ay maikli at mapait.

Ayon kay Hontiveros ito ay naging padalus-dalos ang si Pangulong Rodrigo Duterte sa desisyon nitong italaga si De Castro para lamang patuloy niyang makontrol ang Supreme Court.

“President Rodrigo Duterte’s appointment of the one who will become the shortest-serving Chief Justice in the country’s history is absolutely shortsighted,” saad sa pahayag ni Hontiveros.

Binatikos rin nina dating Solicitor General Florin Hilbay at Congressman Gary Alejano ang paghirang ni Duterte kay De Castro na tinawag nilang bayad-utang dahil sa pagpapatalsik kay Sereno.

FITTING FINALE

Ngunit para sa mga nakasama ni De Castro sa hudikatura, siya ay karapat-dapat na maging CJ.

Inilarawan ni Justice Secretary Menardo Guevarra na “fitting finale” ang pagtatalaga kay De Castro. Aniya, ang appointment na ito kay De Castro ay isang magandang panapos sa kanyang 45 taong paninilbihan sa hudikatura, na nagsimula noon pang 1973.

Ikinatuwa naman ni dating Associate Justice at ngayo’y Ombudsman Samuel Martires ang appointment ni De Castro na dati niyang Presiding Judge sa Sandiganbayan.

Inilarawan niya ito na mabait na kaibigan, may takot sa Diyos, masipag, istrikto, at nakapanig sa katotohanan.

Sinabi ni Sandiganbayan Presiding Justice Amparo Cabotaje-Tang, nakaka-proud lalo at sa kanilang Korte nanggaling si De Castro.