13 sugatan sa karambola
Umabot sa 13 katao ang nasugatan sa pagkakarambola ng tatlong sasakyan sa Commonwealth Avenue sa Quezon City, kahapon ng madaling araw, batay sa ulat ng Traffic Sector 5 ng Quezon City District Traffic Enforcement Unit (QCDTEU).
Base sa report ni Supt. Roldante Sarmiento, ganap na 12:40 ng umaga nang magkasalpukan ang tatlong sasakyan sa tapat ng ginagawang gasolinahan sa kanto ng Malakas Street sa Commomwealth, Barangay Old Balara.
Lumitaw sa imbestigasyon ni PO3 Leonardo T. Policarpio, ng Traffic Sector 5, na matulin umanong tinatahak ng Mitsubishi Adventure (UVA711), na minamaneho ni Rolando Siguro, ng Montalban, Rizal, ang northbound lane ng Commonwealth nang matumbok nito ang kanang bahagi ng Nissan Sentra (SEV- 172) na minamaneho ni Chito Fortu, ng Diliman.
Sa lakas ng pagkabundol, umikot ang kotse sa gitna ng kalsada, na sinalpok ng paparating noon na Yutong Bus, na minamaneho ni Marjon Caubat, ng Pandi, Bulacan.
Batay sa imbestigasyon ni PO3 Policarpio, tumama ang kotse sa bakal na barrier, at sa kabuuan ay 13 katao ang nasugatan, kabilang ang tatlong driver.
Kabilang sa mga nasugatan at isinugod sa East Avenue Medical Center sina Malisa Perez, Gibete Veric, Ralph Joseph at Raymund Villanueva, pawang tagaMurphy, Cubao; Mariel Castro, ng Montalban, Rizal; Rommel Chicano, ng Rodriguez, Rizal; Eimee Labil at Ricard Estimo, ng San Mateo, Rizal; at Dennis Cordero, ng Quezon City.
Kinasuhan na ng Traffiic Sector 5 ng reckless imprudence resulting to injuries at damage to properties sina Siguro, Fortu, at Caubat.