Duchess Meghan, balik-TV para sa royal documentary
MAGBABALIK sa small screen ang dating aktres na si Meghan, Duchess of Sussex para sa isang bagong serye ng dokumentaryo tungkol kay Queen Elizabeth II, iniulat ng Cover Media.
Tinalikuran ng dating Suits star ang pag-arte matapos ma-engaged kay Prince
Harry ng Britanya noong Nobyembre ng nakalipas na taon, ngunit mapapabilang siya sa darating na two-part show kasama ang kanyang asawa at ang mga royal in-laws, tungkol sa relasyon sa pagitan ng isang monarch at Commonwealth.
Sinabi ng isang source sa People.com na napabilang si Meghan sa “[a] conversation, a stand-up chat” para sa Queen of the World, na nakatakdang iere sa U.K network na ITV sa Setyembre 18.
Ayon sa ITV News’ royal correspondent na si Chris Ship tatalakayin ng Americanborn Duchess ang kanyang mga naging karanasan kasama ang Commonwealth, at magbabahagi ng detalye tungkol sa kanyang wedding dress at veil, na embroided ng bulaklak mula sa 53 miyembrong bansa.
Lalabas din sa nasabing dokumentaryo ang kapatid ni Prince Harry na si Prince William at ang kanilang ama na si Prince Charles, habang sina Princess Anne at ang asawa ni Prince Edward na si Sophie, Countess of Wessex ay naiulat na humarap sa isang formal sit-down interview para sa palabas.
Bagamat hindi kinukumpirma ng producers ang magiging laman ng dokumentaryo, ipinangako naman nito sa mga manonood na kasama rito ang mga “behind-the-scenes moments with the Sovereign and other members of the Royal Family”.
“As the family and world leaders discuss the importance of the Commonwealth to the Queen, the series will document the way in which she passes her knowledge and experience to the younger generations,” ayon pa sa pahayag.
Inaasahang ipalalabas ang Queen of the World bago ang nakatakdang royal tour of the Commonwealth nina Meghan at Prince Harry sa mga bansa ng Australia, Fiji, Tonga, at New Zealand sa mga susunod na linggo.