6 arestado sa 16 na ‘shabu’ sachets
Arestado ang anim na katao matapos na makumpiskahan ng 16 na pakete ng umano’y shabu sa isang bahay sa lungsod, kamakalawa ng hapon.
Naghihimas ng rehas at nahaharap sa kasong paglabag sa Comprehensive Dangerous Drugs Act of 2002 (RA 9165) ang mga suspek na sina Elidan Sumampong y Alberto, 40; Asya Dela y Sumampong, 37; Paolo Maralit y Nadela, 22; Joel Penaflor y Mangampong, 39; at Marlon Talagtag y Abinal, nasa hustong gulang, pawang ng Barangay Tanyag, Taguig City.
Sa ulat na ipinarating ng Southern Police District (SPD), nagsilbi ng search warrant ang awtoridad, sa pangunguna ni Senior Insp. Glenn Amsiwen, sa isang bahay sa Block 127 Purok 4, Bgy. Tanyag, bandang 5:30 ng hapon.
Nadatnan ang limang suspek sa loob ng naturang bahay at sa paghalughog ng mga pulis ay narekober ang 15 pakete ng umano’y shabu, na may timbang na 4.8 gramo.
Samantala, kalaboso rin ang suspek na si Arnold Alloso y Ricana, 37, at nakatira sa 8th Street, GHQ Village, Bgy. Katuparan, Taguig City.
Nagsasagawa ng anti-criminality operation ang mga tauhan ng Police Community Precinct (PCP) 8 nang matiyempuhan ang suspek at mahulihan ng isang pakete ng umano’y shabu sa Block 10 Phase 2, Bgy. Pinagsama ng nabanggit na lungsod, dakong 7:40 ng gabi.
Dinala ang mga suspek sa tanggapan ng Station Drugs Enforcement Unit (SDEU) upang imbestigahan at sampahan ng kaukulang kaso.