Pinoys sa HK inalerto sa ‘Mangkhut’
HONG KONG (AFP, Reuters) – Sa unang pagkakataon sa kasaysayan nito, isinara ng Macau ang lahat ng casino bago dumating ang Bagyong Mangkhut, sa pagbabala ng mga awtoridad na ang gambling enclave ay tatamaan ng matinding baha.
Matinding batikos ang inabot ng Macau government mula sa mga residente noong nakaraang taon dahil sa kabiguang ihanda ang lungsod bago sa Bagyong Hato, na nagiwan ng malawakang pinsala at pumatay ng 12 katao.
Inihayag ng mga awtoridad nitong Sabado na ang desisyong isara ang 42 casinos sa Macau ay inaprubahan ng city leader at sumang-ayon ang gaming bosses.
‘’The suspension of gaming operations is for the safety of casino employees, visitors to the city and residents,’’ sinabi ng gobyerno.
Isasara ang mga venue sa semiautonomous southern Chinese city hanggang sa hindi pa mabatid na panahon sa pagtaas ng lungsod sa second highest storm warning nito.
Sinabi ng Macau weather bureau na ang storm warning ay itataas sa pinakamataas na T10 level kinahapunan ng Linggo at inaasahan ang pinakamalakas na ulan sa katanghalian. Pinakuan ng tabla ang mga tindahan at negosyo at prinotektahan ng sandbags sa buong lungsod, at walang makikitang tao sa mga kalye na karaniwang puno ng mga turista.
Matapos salantain ang mga Pilipinas, muling nagpalakas ang bagyong Mangkhut habang patungong Hong Kong, southern Guangdong province, at Macau. Ito ang pinakamalakas na bagyong tumama sa rehiyon ngayong taon sa hanging 200 kph, katumbas ng maximum Category 5 “intense hurricane” sa Atlantic.
“According to the present forecast track, Mangkhut will be closest to the Pearl River Delta around noontime (0200 GMT),” sinabi ng Hong Kong Observatory.
Dakong tanghali kahapon, nasa pinakamataas na No. 10 typhoon signal na ang Hong Kong, sa paghampas ng matataas na alon sa mababang lugar at matinding hangin na sumisipol sa nagtataasang gusali ng lungsod.
Lumikas ang mga residenteng nasa mababang lugar sa takot sa storm surges na umaabot sa 3.5 m (12 ft).
Libu-libong biyahero ang stranded sa Hong Kong’s international airport dahil sa mga nakanselang flights. Noong nakaraang linggo pa nagkansela ng kanilang mga biyahe ang airlines, gaya ng flagship carrier na Cathay Pacific.
MGA PINOY PINAG-IINGAT Kaugnay nito, pinayuhan ng Department of Foreign Affairs (DFA) ang Filipino Community sa Hong Kong na mag-ingat sa pananalasa ng Bagyong Mangkhut.
Nanawagan ang Konsulado ng Pilipinas sa Hong Kong sa 227,000 Pilipinos sa nasabing teritoryo na manatili sa loob ng kanilang bahay at ipagpaliban ang anumang pagbiyahe o mga aktibidad sa labas.
Inabisuhan naman ni Consul General Antonio Morales ang mga kabaayan na magmonitor ng weather bulletins at sumunod sa mga kautusan ng lokal na mga awtoridad.
Ayon kay Morales, handa ang Konsulado na magkaloob ng ayuda sa mga Pilipino sa oras ng emergency. Tumawag lamang sila sa 999 o Consulate Hotline +852.9155.4023.