MOVE sets ilarga sa mga binagyong lugar

Dapat nang ilunsad ng Department of Information and Communications Technology (DICT) ang bagong emergency communications system nito sa mga lugar na sinalanta ng kalamidad, himok ni Senador Juan Edgardo “Sonny” Angara kahapon.

Ito ang panawagan ni Angara sa pagkilos ng bansa matapos ang pananalasa ng Bagyong Ompong (international name: Mangkhut) sa Luzon.

Sa huling ulat, 28 katao ang kumpirmadong nasawi sa bagyo nitong Sabado, karamihan ay sa Cordillera Administrative Region (CAR).

Iniwan din ng bagyo na walang kuryente ang halos lahat ng lalawigan sa hilagang Luzon.

Ipinunto ni Angara na ngayong taon, tumanggap ang DICT ng P192 milyon para sa pagbili ng anim na Mobile Operations Vehicles for Emergency (MOVE) – ang flagship component ng emergency communications system ng ahensiya na naglalayong tulungan ang mga komunidad sa Pilipinas na maging mas matatag sa mga kalamidad.

Bilang Senate finance committee vice chairperson na inatasang depensahan ang budget ng DICT, isinulong ni Angara na isama ang anim MOVE sets sa panukalang 2018 budget ng ahensiya.

“One of the first casualties when disaster strikes is the communication infrastructure,” punto ni Angara.

“Response to people immediately needing help and coordination among responders are impeded and delayed because they could not communicate,” aniya.

Sinabing senador na sa paglalagay ng MOVE project, makapagkakaloob ang gobyerno ng communication system “crucial in delivering help and services and in saving lives.”

Nilalayon ng proyekto na tiyakin ang pagkakaroon ng mobile emergency vehicles sa inisyal na strategic areas gaya ng National Capital Region (NCR), Clark, Batangas, Cebu, Cagayan De Oro at Davao City para maging mas madali ang pagpapadala nito sa mga karatig na lalawigang nangangailangan.

Kabilang sa roll-out sites nito sa hinaharap ang Bicol, Tuguegarao sa Cagayan, Samar at Zamboanga City, ani Angara.

Ayon sa DICT, ang bawat MOVE set ay mayroong isang six-wheeler truck na magsisilbing command at control center para mag-coordinate ng mga pagsisikap sa first-responders at National Disaster Risk Reduction and Management Council (NDRRMC), gayundin sa base station malapit sa evacuation centers para magkaroon ng komunikasyon ang evacuees sa kanilang mga mahal sa buhay.

“Hopefully, the DICT will be able to implement this project at the soonest possible time,” anang senador.