Fox, walang visa extension

Tinanggihan ng Bureau of Immigration (BI) ang kahilingan ng Australian missionary na si Sister Patricia Fox na mapalawig ang kanyang missionary visa.

Sa dalawang-pahinang kautusan, tinanggihan ng BI ang hiling na visa extension ni Fox sa pamamagitan ng petisyon ng Superior of the Religieuse De Notre Dame De Sion, Inc., dahil sa deportation order na dati nang nailabas laban sa madre.

“The BI already saw that Sister Fox violated the conditions of her stay and is considered undesirable, hence a deportation order was previously issued against her,” ani Dana Krizia Sandoval, tagapagsalita ng BI.

Inoobliga ng BI si Fox na i-downgrade ang kanyang visa sa loob ng 15 araw na matanggap niya ang denial order.

“Downgrading will revert her status to a temporary visitor’s visa, with a 59-day validity, starting from the date of the expiry of her missionary visa,” ani Sandoval.