Pagkalat ng tuberculosis, agapan
NAGTIPUN-TIPON ang mga kinatawan mula sa iba’t ibang ahensiya ng pamahalaan, mga pribadong organisasyon, transport group at mga mag-aaral sa Western Visayas para sa unang “Citizens Iloilo Coalition Against TB” summit upang labanan at maiwasan ang pagkalat ng tuberculosis (TB).
Sa temang “Strengthening Linkages through Active Engagement with Partners,” pinangunahan ang summit ng Center for Infection and Control Treatment (CICAT) sa pakikipagtulungan ng Department of Health 6 (DoH-6)(Western Visayas).
Sa isang pulong-balitaan, sinabi ni CICAT chair Ellamae Divinagracia na kailangan ng iba’t ibang grupo na magkaisa at pangunahan ang kampanya laban sa TB.
Sa datos ng DoH-6 nitong Hunyo, mahigit 14,000 kaso ng TB ang naitala sa buong rehiyon .
Aniya, ang maagang pagtukoy at pagbibigay ng lunas ang susi para malabanan ang pagkalat ng TB.
“If you are already experiencing symptoms of TB, you should immediately consult your doctor and start treatment,” aniya.
Mula ang tuberculosis sa bacteria (mycobacterium tuberculosis) na kadalasang nakaaapekto sa baga, ayon sa World Health Organization (WHO). Kabilang sa mga sintomas nito ang ubo, lagnat at pagbaba ng timbang.
Ipinunto naman ni Divinagracia na maaaring maiwasan at malunasan ang sakit na ito.
Kabilang sa tinalakay sa summit ang multi-drug resistant tuberculosis, holistic approach to TB-HIV (human immunodeficiency virus) management, at TB in the workplace.
Sinabi naman ni Ma. Sophia Pulmones, pinuno ng Local Health Support Division of DOH-6, na bukod sa kampanya para maiwasan ang sakit sa lugar, tinututukan din nila na maiwasan ang pagkalat ng sakit sa trabaho.
Binanggit na halimbawa ng opisyal ang mga health workers na malapit sa pagkakaroon ng sakit lalo’t nakakasalamuha ng mga ito ang mga TB patient.
Samantala, umaasa naman si Divinagracia na taunan nang maisagawa ang summit upang makamit nila ang target na zero TB case sa taong 2022.