Parak na nangotong sa preso, kalaboso
Arestado ng Philippine National Police-Counter Intelligence Task Force (PNP-CITF) ang isang operatiba ng Manila Police District (MPD), makaraang kotongan umano ang isang drug detainee kapalit ng ginhawa nito sa piitan.
Sa reklamo sa CITF ni Jericho Silvestre, drug detainee, sinabi niyang kinikilan umano siya ni PO1 Alexis Domingo ng P5,000 cash mailipat siya sa maginhawa at maluwag na selda.
Kaugnay nito, humingi pa umano ang pulis ng karagdagaang P7,000 para mapabilis ang paglipat ni Silvestre sa Quezon City, kaya kaagad na nagsagawa ng entrapment operation ang CITF.
Mariin namang pinabulaanan ni Domingo ang alegasyon sa kanya at iginiit na wala naman talagang VIP treatment sa mga preso.
Gayunman, ipinag-utos ni National Capital Region Police Office (NCRPO) Director Guillermo Lorenzo T. Eleazar sa pamunuan ng MPD na sibakin ang 11 tauhan ng District Drug Enforcement Unit (DDEU) habang isinasagawa ang masusing imbestigasyon sa kaso.