‘Paeng’ papasok ngayon sa PAR—PAGASA
Patuloy na lumalakas ang bagyong may international name na ‘Trami’ habang tinatahak nito ang Philippine area of responsibility (PAR), kahapon.
Sa abiso ng Philippine Atmospheric, Geophysical and Astronomical Services Administration (PAGASA), inaasahang papasok sa bansa ngayong Linggo ang naturang bagyo.
Kapag tuluyan nang nakapasok, papangalanan itong ‘Paeng’.
Kahapon, huling namataan ang bagyo sa layong 2,060 kilometro sa silangan ng Central Luzon, taglay ang lakas ng hanging 75 kilometers per hour (kph) at bugsong hanggang 90 kph.
Ito ay kumikilos pakanluranhilagang kanluran sa bilis na 15 kph.
Maapektuhan nito ang dulong bahagi ng Northern Luzon sa Biyernes (Setyembre 28) kapag hindi magbabago ang direksyon nito.
Binanggit ng PAGASA na posible pang mag-ipon ng lakas ang bagyo habang papalapit sa Batanes at Babuyan Group of Islands sa susunod na linggo.
Inaasahan naman ng ahensiya na makararanas ng pag-ulan ang ilang bahagi ng Metro Manila, Southern Luzon, Eastern at Central Visayas, Zamboanga Peninsula, Caraga, at Northern Mindanao, dahil na rin sa intertropical convergence zone (ITCZ).