Obispo, arestado sa rape sa madre

KOCHI, India (Reuters) – Arestado ang isang obispo ng Simbahang Katoliko sa katimugang bahagi ng Kerala sa India nitong Biyernes, dahil sa panggagahasa umano sa isang madre.

Hunyo nang maghain ng reklamo sa pulisya ang madre, dahil umano sa kawalan ng aksiyon ng Simbahan sa kabila ng paulit-ulit niyang apela.

Una nang itinanggi ni Bishop Franco Mulakkal, pinuno ng diocese sa Jalandhar sa hilagang estado ng Punjab, ang akusasyon, bagamat isang araw bago ang pag-aresto ay tinanggap na ng Vatican ang hiling ng obispo na pansamantala siyang bumaba sa puwesto.

Samantala, nangyari ang pag-aresto sa gitna ng tumitinding eskandalo ng mga pang-aabuso sa loob ng Simbahang Katolika sa iba’t ibang bahagi ng mundo, kabilang ang Amerika, Chile, Australia, Germany at iba pang mga bansa.