Mag-best friend, timbog sa buy-bust
Hanggang sa loob ng kulungan ay magkasama pa rin ang dalawang lalaking mag-best friend matapos silang maaresto ng mga pulis sa buy-bust operation sa Malabon City, kahapon ng madaling araw.
Nahaharap sa paglabag sa Comprehensive Dangerous Drugs Act (RA 9165) sina Ricardo Dela Cruz, 39; at Homerto Biazon, 29, kapwa taga-Barangay Dulong Duhat, Malabon.
Kuwento ni Senior Insp. Johnny Baltan, ng Station Drug Enforcement Unit (SDEU) ng Malabon Police, nagkasa sila ng buy-bust operation, dakong 4:00 ng umaga kasama ang mga operatiba ng Philippine Drug Enforcement Agency (PDEA).
Target ng grupo ang magkaibigang sina Biazon at Dela Cruz na matagal nang under surveillance ng mga awtoridad at kilalang mga tulak sa Bgy. Dulong Duhat.
Isa sa mga pulis ang poseur buyer na umiskor ng P1,000 halaga ng shabu sa matalik na magkaibigan, at nang iabot na ng mga suspek ang limang plastic sachet ng shabu sa buyer ay inaresto sila ng mga awtoridad.
Inaalam naman ng Malabon Police kung may ibang kaso pang kinasasangkutan ang mag-best friend.