8 bumabatak sa kalsada, pinagdadakma

Parang mga daga na nagpulasan ng takbo ang walong katao, kabilang ang dalawang menor de edad, matapos silang habulin ng mga pulis nang naaktuhan sila umanong nagsasagawa ng shabu session sa kalsada sa Navotas City, kahapon ng madaling araw.

Kinilala ang mga nadakip na sina Arturo Bases, 21, ng Bisugo Street; John Laurence Bajade, 20, ng Bariles Street; Rene Martin, 19, ng M. Naval Street; Gerald Coloso, 30, ng Samson Road, Caloocan City; John Robert Pamintuan, 25, ng Barangay Bangkulasi; Alvin Malasig, ng Bgy. San Jose; at dalawang binatilyo, edad 16 at 17.

Ayon sa ulat ng pulisya, dakong 2:00 ng umaga at nagsasagawa ng Simultaneous Anti-Criminal Law Enforcement Operation (SACLEO) ang mga tauhan ng Station Drug Enforcement Unit (SDEU), Special Reaction Unit-Special Weapon and Tactics (SRU-SWAT), at Station Intelligence Branch (SIB) ng Navotas Police sa loob ng Market 3 Fish Port sa Bgy. NBBN sa lungsod nang napansin ang pagkukumpulan ng mga suspek.

Nasa gilid ng kalsada ang mga suspek at nang lapitan ay natuklasan ng mga awtoridad na bumabatak umano ng shabu ang mga ito.

Nang mapansin ng mga suspek ang papalapit na mga pulis ay nagkani-kanyang takbuhan ang mga ito, pero hinabol sila ng mga awtoridad at isa-isang hinuli.

Nakuha umano sa anim na suspek ang tig-iisang plastic sachet na may lamang shabu.

Kinasuhan ng paglabag sa Comprehensive Dangerous Drugs Act (RA 9165) ang anim sa mga suspek, habang dinala naman sa holding area ng City Social Welfare and Development Office (CSWDO) ang dalawang binatilyo.