2 nagbebenta ng Kush online, timbog

Arestado ang isang criminology student at isa pa niyang kasamahan matapos matuklasan ang pagbebenta umano nila ng imported na high-grade marijuana, gamit ang social media, sa San Juan City, nitong Biyernes.

Batay sa ulat sa Eastern Police District (EPD), na pinamumunuan ni Chief Supt. Bernabe Balba, kinilala ang mga naaresto na sina John Joseph Delos Reyes, 20, binata, BS Criminology student sa isang unibersidad sa Maynila, at taga-Barangay Balong Bato; at Lloyd Lumogdang, 23, ng Bgy. Pedro Cruz, San Juan City.

Sa report ni San Juan City Police chief, Senior Supt. Dindo Reyes, nabatid na dakong 12:10 ng umaga nang maaresto ng mga tauhan ng Station Drug Enforcement Unit (SDEU) ang mga suspek sa N. Domingo Street, sa Bgy. Balong Bato.

Nauna rito, nakatanggap ang pulisya ng tip na si Delos Reyes ay supplier umano ng high-grade na marijuana, na kilala sa tawag na “Kush”, habang si Lumogdang naman ang nagsisilbi umanong runner ni Delos Reyes, kaya isinailalim sa surveillance ang dalawa.

Dinampot ng grupo ng SDEU, sa pangunguna ni SPO3 Gerard Crisostomo, ang mga suspek nang maaktuhan umanong nagbebenta ng Kush, sa tulong ng isang impormante na naging customer ng dalawa.

Sinabi ni Senior Supt. Reyes na umamin umano ang mga suspek sa pagbebenta ng dried marijuana leaves, na galing pa sa ibang bansa at ipinadadala sa kanila sa pamamagitan ng postal service, kaya rito naman nakatuon ang imbestigasyon ng mga awtoridad.

Nakapiit na ang mga suspek, na nakumpiskahan umano ng P3,000 halaga ng Kush at marked money.