Aguilar, 10 araw na mababakante sa injury

HINDI basta pinagpahinga lamang si Japeth Aguilar sa nakaraang 118-124 na kabiguan ng Barangay Ginebra San Miguel sa kamay ng Blackwater noong Biyernes.

Mismong si Aguilar ang umamin na kailangan niyang magpahinga dahil mayroon syang "strained right calf injury".

“May injury ako actually. Nahurt ko yung [right] calf ko nung last practice,” pahayag ng 6-foot-9 Gilas Pilipinas big man.

Kagagaling pa lamang ni Aguilar sa Gilas campaign noong Lunes kung saan nagtapos siyang may team-high 16 puntos at 9 na rebounds sa kanilang 92-81 panalo kontra Qatar sa 2019 FIBA World Cup Asian Qualifiers.

Ayon kay Aguilar, naramdaman na niya ang nasabing injury sa huling dalawang minuto ng laban nila kontra Qatar ngunit nag-ensayo pa rin siya sa Ginebra kaya ito lumala.

“Actually, last two minutes ng Qatar game, dun ko naramdaman.Alam kong may game kami, tapos yun, nagtry akong magpractice tapos during practice, na-injure ko siya ulit."

May 10 araw na hindi makakalaro ng basketball si Aguilar hangga't walang pahintulot mula sa kanilang team doctor.

Dahil dito, nahanay si Aguilar sa humahabang injured list ng Kings na kinabibilangan nina Greg Slaughter (left ankle injury), Jervy Cruz (bone spur), Sol Mercado (knee), at Raymond Aguilar.