Apat na preso bistado sa drug paraphernalia
Ilang drug paraphernalia at isang cell phone ang nasamsam mula sa apat na bilanggo sa isang isang female detention facility sa Quezon City Police Station 8, nitong linggo.
Kinilala ni Quezon City Police District-Project 4 Police Station (PS-8) Commander, Superintendent Ophelio Concina, Jr., ang mga suspek na sina Jennylyn Manaois, 24; Jemma Matotte, 25; Jojie Mota, 51; at Abegail Adriano, 35; pawang bilanggo sa PS-8.
Ayon kay Concina, nakatanggap sila ng impormasyon hinggil sa umano’y pot session sa loob ng female detention facility ng PS-8, kaya nagsagawa ng sorpresang inspeksiyon.
Pinamunuan ng mga operatiba ng PS-8 Drug Enforcement Unit, Women and Children’s Protection Desk at duty jailer ang sorpresang inspeksiyon sa loob ng female detention facility ng istasyon na nagresulta sa pagkakarekober ng tatlong aluminum silver foil na ginagamit bilang improvised tooter, dalawang lighters, at isang android mobile phone.
Agad na inimbestigahan ang mga sangkot na bilanggo upang makakalap ng impormasyon tungkol sa pinagmulan ng nakuhang mga ebidensiya.
Lumalabas na isang bisita ng isa sa mga suspek ang nagpuslit ng droga sa naturang bilangguan, ayon kay Concina.
Idinagdag ng station commander na ang apat na babaeng bilanggo ay nagpositibo sa drug test.
Kinasuhan ang apat na suspek ng paglabag sa Section 12 at 14 ng RA 9165 o illegal possesion of drug paraphernalia at pot session.